Naturaj albumoj

1981

Sinij albom (Blua albumo)
La unua albumo de Akvarium kaj la unua profesie registrita albumo en la historio de la rusa rok-muziko, kiu tiam estis tute neoficiala. En la “Blua albumo” estas bone perceptebla la muzika maniero de Akvarium – kaj per la sono, jen mola, jen saturita kaj impeta, kaj en emocia, treege sincera plenummaniero, kaj en tekstoj. Kaj, plej grave, en spirito de libero, kiu ŝvebas tra la tuta albumo. La albumo estas plejparte akustika, sed en "La elektra hundo" kaj "Strangaj objektoj inter lumo kaj sono" sonas elektra gitaro.

Treugolnik (Triangulo)
“Albumo de pura kaj senrespondeca absurdo”. (B.G.) Efektive titolo de la albumo estas simbolo mem, pentrita sur la kovrilo, sed ne la vorto “triangulo”. La tekstojn aŭtoris B.G. kaj Anatolij Gunickij. Dum registrado de ĉi albumo en Akvarium la unuan fojon aperis brilega muzikisto Sergej Kurjoĥin. Tekstoj de la kantoj el “Triangulo” estas plej altkvalita absurdo. Muziko estas konforma, kvankam ĝi estas bazita sur la tradiciaj harmonioj (klavaro de Sergej Kurjoĥin plus multegaj, plej neimageblaj ideoj kaj efektoj plus ŝpruceganta vivĝojo). Multaj homoj ekŝatis Akvarium-on ĝuste pro ĉi tiu albumo.

Elektriĉestvo (Elektro)
La unua flanko de la albumo estas koncerta registraĵo – kantado de Akvarium en la kartvela urbo Gori (festivalo Tbilisi-80). Muzikklavaron ludas Martins Braun – komponisto el Riga. Muziko klare inklinas al punkismo. La dua flanko estas studia registraĵo (farita en studio de Andrej Tropillo) – “tempo de pleja ekstremeco de niaj imagoj pri reggae & dub”. (B.G.)

Akustika (Akustiko)
En ĉi tiu albumo estas kolektitaj kantoj, luditaj dum hejmaj koncertoj de la grupo inter 1978 kaj 1986 jj kaj registritaj en studio. Unu el la plej ŝatataj albumoj de aŭskultantoj. Pura, provita sono, melodieco, beleco kaj diverseco de la kantoj – ekde sincere strida liriko ĝis precizaj filozofiaj difinoj kaj akraj karakterizoj de la epoko. Versoj el la kantoj rapide aforismiĝis.

Tabu (Tabuo)
Elektra albumo kun tre nervoza humoro kaj streĉita sono. Muzikklavaro de Sergej Kurjoĥin, gitaro de Aleksandr Ljapin. Ĝi estas la sola albumo, kie apud la titolo de la grupo surkovrile estas metita demandosigno. La ĝenerala humoro estas parte ekvilibrita de la fina instrumenta komponaĵo “Radamaerl”.

Radio Africa (Radio Afriko)
“Plensanga diverse pozitiva albumo”. (B.G.) Realigo de la kapablo de Akvarium trovadi harmonion en diverseco. Enestas kantoj de plej malsamaj stiloj (rok-n-roll, regeo, etnaj motivoj ktp) kaj humoroj, konsistigantaj vivantan unuecan tuton. Komence kaj fine de la albumo aŭdiĝas kariljono, inter la kantoj anstataŭ paŭzoj estas sonoj de radia etero.

Iĥtiologija (Iĥtiologio)
Ĝi estas registraĵo de hejmaj koncertoj de la grupo, kiu tiam ne rajtis publike koncerti. “Tial instrumentaĵo estas pli-malpli asketeca”. Sed tio tutplene kompenciĝas per energio de viva plenumo kaj energio de la tekstoj, kiuj dum hejmaj koncertoj estas ĉefe atentataj.

Den’ serebra (Tago de Arĝento)
“Ĉi tiu registraĵo kaj ĉi tiu albumo, laŭ mia percepto, estis ideala Akvarium de la mezo de la 1980-j jj”. (B.G.) Ĝi estas albumo kun multfaceta muziko, fabela violono de Aleksandr Kussul. Riĉaj je asocioj tekstoj, lertega, malvarmeta sono (kanto “Okulo” laŭ la sono iom kontrastas kun la ceteraj).

Deti Dekabrja (Infanoj de Decembro)
Unu el la plej fortaj albumoj de Akvarium en la 1980-j jj. En ĝi estas kaj resonoj de poemoj de irlandaj bardoj, kaj "fentezi", kaj modernaj vortludoj, kaj tipe Akvarium-a humuro kaj eklektiko. Sama estas la muzika diapazono – ekde kelta magiaĵo “Kad Koddo” kaj “Vilaĝo”, ĝis la ritmega “Ŝi povas sin movi” kaj variega sontorento “2-12-85-06”.

Desjat’ strel (Dek sagoj)
Koncertaj registraĵoj de 1985-1986. La albumo omaĝas la memoron pri la bonega violonisto Aleksandr Kussul, en la albumo ofte sonas lia violono. En “Dek sagoj”-n eniris ne nur ĝis tiam neeldonitaj kantoj, sed ankaŭ koncertaj versioj de kantoj el la antaŭaj albumoj. La sola kanto, registrita en studio, estas “La urbo” (teksto de A.Volĥonskij kaj A.Ĥvostenko, muziko de F. de Milano). Ĝi fariĝis unu el la plej gravaj kantoj de Akvarium. “En du strofoj oni diris ĉion, kion homo bezonas scii”. (B.G.)

Ravnodenstvije (Ekvinokso)
La albumo estis registrita en la ŝtata studio “Melodija”. Sekve de kelkaj kaŭzoj konsisto de kantoj en la albumo estas iom alia, ol estis origine pripensita. La albumo muzike estas komplika, sonas pluraj instrumentoj. Atmosfero de la kanto “Ekvinokso” similas tiun de la libroj de Tolkien, fine de “Partizanoj de la plena luno” eĉ sonas strofo en la elfa lingvo. Tamen, la albumo finiĝas per publicisme akra kanto “Generacio de stratbalaistoj kaj gardistoj”.

Russkij albom (Rusa albumo)
“Rusa albumo” ne estas Akvarium, sed BG-band (la samaj homoj, alia misio). En “Rusa albumo” preskaŭ mankas tipa por Akvarium muzika kaj teksta eklektiko, senteblas nur domina influo de la rusa popolmuziko. Ĉiu kanto estas eniro en la rusan spacon, kun ĝiaj doloro kaj lumo. La kantoj estas laŭ sia spirito profunde religiaj. La kantado estas tre emociplena, la muziko estas akustike dense saturita. Oni uzas popolajn muzikilojn.

Ljubimyje pesni Ramzesa IV (Ŝatataj kantoj de Ramzes la IV-a)
“Ramzes la IV-a efektive havas rilaton al ĉi tiu muziko”. (B.G.) Ĉiu kanto estas pordo al aparta, speciala mondo. La kantoj estas tre malsamaj, sed klare senteblas la unueco. En la perfekte plenumata muziko kun psikodelia kromgusto aŭdeblas orientaj motivoj. La albumo esence plilarĝigas limojn de percepto.

Kostroma mon amour
“La albumo rezultiĝis neelpensita kaj – tial – tre ŝatata”. (B.G.) Unu el la plej helaj kaj elkoraj albumoj de Akvarium. La kantoj estas muzike melodiaj, “tre” rusaj, multas la valsaj ritmoj. En la tekstoj observeblas malofte harmonia konekso de ortodoksa kristanismo kaj budaismo. Estas larĝa paletro de humoroj, ĝenerala tono de la albumo estas pura graca ĝojo.

Navigator (Naviganto)
La albumo estis registrita en London, en “Livingston Studio”. Unu el la plej famaj kaj popularaj albumoj de Akvarium. La humoro plejparte estas (s)ombra, la kantoj profunde konformas al la rusia realo de tiu tempo, kiam la albumo aperis. La muziko estas varia, ekde pezaj kantoj ĝis softaj melodiaj lirikaĵoj. En la interna flanko de la kovrilo oni skribis: “La tuta bono, kiu troviĝas en la albumo, servu por ĉesigi militojn en Rusio kaj ekster ĝi”.

Sneĵnyj lev (Neĝa leono)
La albumo ekas per la instrumenta komponaĵo “La arĝenta Rozo”. En la albumo rimarkeblas plej malsamaj muzikaj direktoj kaj asocioj – ekde hinda muziko ("Incidento en Nastasjino") ĝis bluso ("Antikva-rusa sopiro"), sed dominas mola, por Akvarium tre karaktera sono kun multaj ornamaĵoj ("Dubrovskij", "La Granda Fervoja Simfonio"). La humoroj estas malsamaj, ekde morneta “Ĉasaviadilo” ĝis gaja “Incidento en Nastasjino”.

Giperboreja (Hiperboreo)
“La plej proksima literatura analogo de ĉi tiu muziko estas libroj de Michel Murkock, sed muzikajn analogojn mi ne konas”. (B.G.) Hiperboreo estas sankta lando malantaŭ la Norda Vento (laŭ PIV Hiperboreoj estas “popolo loĝanta en la ekstrema nordo” – rim. de la tradukisto). La kantoj laŭ sia spirito kaj simboliko proksimas al “fentezi”-literaturo, sed samtempe ili ne estas ekster la realeco de la konkreta tera tempo, tamen esprimantaj ĝin neatendite akre. En la tekstoj, malsimplaj el la vidpunkto de kutima percepto, senteblas ĉeesto de fortegaj profundaj sencoj. La muziko prezentas sin kiel interagado de Kaoso kaj Harmonio.

Lilit
Boris Grebenshikov registris ĉi tiun albumon en Woodstock kune kun la legenda bando “The Band”. Lilit, laŭ kelkaj mitologiaj konceptoj, estis la unua edzino de Adam. En astrologio Lilit estas fikcia planedo La Nigra Luno. La albumo estas dediĉita al La Granda Patrino, en ĝi estas multaj alparoloj al la virina radiko en ĝiaj malsamaj hipostazoj. La kantoj, heligitaj de la Luno, estas tre energetike fortaj.

La simbolo, fariĝinta la albuma titolo, havas ĉirkaŭ 20 signifojn, kaj ĉiuj ili konvenas al la enhavo de "". La kantoj postlasas impreson de plena noveco kaj sincereco. La tekstoj estas profunde filozofiaj, samtempe simlaj kaj komplikaj. La muziko estas tre varia, de bluso ĝis regeo. En kelkaj kantoj senteblas japanaj motivoj.

Sestra Ĥaos (Fratino Kaoso)
En la albumo forestas preteratenteblaj kantoj. Muzika diapazono larĝas – ekde regeo ("Rastamanoj el provinco") ĝis rapo (“500”), ekde akreco de “Frato Nikotino” ĝis tenereco de “Kardiogramo” kaj ensorĉa beleco de “La Norda Koloro”, kiun kunregistris famega muzikisto-dudukisto Jivan Gasparyan.

Pesni Rybaka (Kantoj de Fiŝkaptisto)
Tre hela albumo, elvokanta senton de ĝojo. En la kantoj troviĝas multe da ironio, humuro kaj multe da tenero. La muzikon ornamas fabela sono de barataj muzikiloj kaj ĵazaj saksofonoj kaj piano. La humoro estas plene malferma al la viva torento.

Aquarium Incognito

Kvarteto de Anna Karenina. Elkoraj kantoj.
Albumo konsistas el instrumentaj komponaĵoj, kiuj estas rimarkeble malkutimaj, tre variaj, profunde novismaj kaj sence saturitaj.

Russian-Abyssinian Orchestra “Bardo”
Rusa-Abisena orkestro estas “anonima duonmonaĥa konsisto, realiganta spiritan muzikon de ne la plej konata tipo”. (B.G.) En 1989 ĉi registraĵo estis lanĉita kiel son-trako (soundtrack) por la kinofilmo de S.Debiĵev “La ora sonĝo”, tamen baldaŭ evidentiĝis, ke ĝi estas io pli granda, ol son-trako. “La kantaj tekstoj havas sencon, tamen ili per homaj nocioj ne tradukeblas”. (B.G.)

Terrarium. “Pjatiugolnyj greĥ” (Terrarium. "Kvinangula peko")
Terrarium estas pseŭdonimo de Akvarium. Temas pri albumo da kantoj, verkitaj laŭ la absurdecaj tekstoj fare de Anatolij “George” Gunickij. La registradon partoprenis ne nur muzikistoj de Akvarium, sed ankaŭ multaj aliaj konataj rusiaj rok-muzikistoj – Maksim Leonidov, Vjaĉeslav Butusov, Sergej Ĉigrakov, Aleksandr Vasiljev, Nastja Poleva k.a. La muziko portas spiriton de rompado de ŝablonoj kaj stereotipoj. En la muzikaj aranĝoj estas multaj eksperimentoj.

Anglalingvaj Albumoj

Radio Silence
Albumo, registrita en Usono kune kun okcidentaj muzikistoj (muzikistoj Eurythmics, Ray Cooper, Michael Ceyman, Darril Way, Shivon Feykhi-Stewart, Billy McCenzy k.a.). La albumon konsistigis kantoj de Boris Grebenshikov en la angla kaj du ruslingvaj – “Junaj leonoj” kaj “Ĉinio”. La sono rimarkeble diferenciĝas disde tiu tradicia de Akvarium kaj estas klinita al flanko de usonaj sonaj standartoj. Pri registrado de ĉi albumo oni produktis dokumentan kinofilmon “Longa vojo hejmen” (“Long way home”).

Radio London
La albumo estas registrita en London. “Preskaŭ ĉio estas registrita en la hejma studio de bas-gitaristo de “Eurhytmics” Chucho Merchana kiel montroversio al follow-up por “Radio Silento”. (B.G.) Sono laŭ karaktero similas al tiu de “Radio Silento”.

Antologioj

Historio de Akvarium. Arkivo. Volumo 3.
La albumon konsistigis kaj koncertaj registraĵoj kaj la studiaj – malnovaj kaj novaj, speciale faritaj por ĉi tiu albumo. Tra la albumo ŝvebas fajna poezieca spirito de la kelta muziko. La muzikaj aranĝoj estas originalaj kaj zorge faritaj.

Babela Biblioteko. Historio de Akvarium. Arkivo. Volumo 4.
Kantoj de 1981-1996 jj, kiuj diverskiale ne estis pli frue registritaj. Kantoj estas tute malsamaj, kaj sufiĉe sarkasmaj “Ĝangalo”, “Kaproj”, “Anĝelo de la tutpopola postebrio”, kaj la filozofia “Stariĝu ĉe rivero”, kaj la magia “Dek kvar”, kaj tre aktualiĝinta plenumo de kanto far Aleksandr Vertinskij “Tio, kion mi devas diri” (“Mi ne scias, kiucele kaj kiu tion bezonas...), kaj unu el la plej amataj kantoj de Akvarium – “Arĝento de mia Dio”.

Peski Peterburga (Sablo de Peterburgo)
“Kantoj de la imagataj 1980-j jj”. Albumo kun tute aparta, nenion similanta humoro kaj sono. Ĝin eniris kantoj, verkitaj inter 1975 kaj 1986 jj. Ĝi estas tre interesa kaj sufiĉe sukcesa provo registri malnovajn kantojn, kelkaj el kiuj apartenas ankoraŭ al la “prahistoria” epoko.

Kunstkamera (Kuriozaĵejo)
Albumo, kiun konsistigis la pli frue neeldonitaj kantoj kaj instrumentaĵoj, kaj du kreaĵoj el la albumo “Ŝatataj kantoj de Ramzes IV” – “Kiel ni revenu hejmen” kaj “La reĝa mateno”, aranĝitaj novmaniere. Aŭskultado de “Kuriozaĵejo” estas vojaĝo laŭ tre diversaj lokoj de la mondo de Akvarium, elokventa ilustraĵo de tio, ke ĉi mondo estas ege varia.

Territorija (Teritorio)
Teritorio de Akvarium. Kantoj, sen kiuj ne eblas imagi Akvarium-on, konsistiganta harmonian bildon, tre larĝan panoramon. Ĉi antologion plejparte konsistigis kantoj de la antaŭaj albumoj. Kelkaj kantoj estis registritaj denove – “Adelaida” el “Ekvinokso”, “Babelo” el “Elektro”, “Monta kristalo” el “Kuriozaĵejo”. “Teritorion” ankaŭ eniris antaŭe neeldonitaj kantoj “Sub la monto, samkiel Ĉkalov”, “Tiu, kiun mi amas” kaj “Nova kanto pri la Patrio”.

Kromregistraĵoj de BG

Kantoj de Aleksandr Vertinskij
Rusan kantan kulturon ne eblas imagi sen Aleksandr Vertinskij – homo de unikaj artista kapablo kaj intonacio. La kantoj de Vertinskij estas aparta mondo, kies protagonisto estas fajna, eleganta kaj koketa. Sed Vertinskij havis ankaŭ akrajn kaj ĝustajn kantojn pri la epoko. Boris Grebenshikov kantas liajn kantojn propramaniere, sed tute ne rompante ties individuecon.

Ĉubĉik (Tufeto)
“En ĉi tiu albumo estas kolektitaj registraĵoj de diversaj jaroj, unuigitaj de la origine rusa emo al festenado kaj strebo kanti kantojn dum tiu”. (B.G.) La albumo prezentas vere popolajn rusiajn kantojn – kantojn, popularajn dum sovetia epoko, urbajn romancojn. La teksto de “Koro” dum la registrado estis iom kre-relaborita. Krome la albumon eniris la apartenantaj al la plumo de B.G. strofetoj (ĉastuŝkoj) “Novjorkaj suferoj” kaj la kanto “Mi pereu senrevene”, kiu “ekde la infanaĝo akompanis Akvarium-on dum la labora ripozo”.

Pribeĵiŝĉe (Azilo)
Albumo de tibetaj mantroj, plenumataj de Boris Grebenshikov, Gabrielle Roth kaj The Mirrors. La eldonita en Usono versio de la albumo titoliĝas “Refuge”. La albumo estas bonege farita, en ĝi senteblas pureco kaj koncentriteco, kiuj donas fortegan energetikan efikon, simila al efiko post religia ceremonio.

Kantoj de Bulat Okudĵava
Bulat Okudĵava estas enorme talenta poeto kaj bardo, unu el la plej inteligentaj homoj de Rusio. Li estas unu el instruistoj de Boris Grebenshikov, kiu multsfere daŭrigas tradiciojn de Okudĵava. Ĉi tiun albumon eniris kantoj de diversaj jaroj, tamen ili estas akceptataj kiel unueca, kaj, plej grave, aktuala kreaĵo. La kantoj estas plenumataj absolute propramaniere, sed ĉiam kun atenta rilato al la originalo kaj kun grandega zorgo pri la muzikaj aranĝoj.

Bardo
Plia laboraĵo de Boris Grebenshikov kun Gabrielle Roth and The Mirrors. Kelkaj kreaĵoj, enirintaj ĉi albumon, estis plenumataj de “Rusa-abisena Orkestro”. Ĝi estas magia muziko. La tekstoj ne estas tradukeblaj en lingvojn, kutimajn por la homaro.